"Kung ano ang Puno, Siya rin ang Bunga"

            “Siyempre ganun ‘yung kinalakihan niya, kaya malamang ganun din siya.”

Iyan ang laging sagot sa akin tuwing itinatanong ko kung bakit ganoon na lamang ang relasyon niya sa ibang tao.

            Lumaki akong may sariling pananaw kung ano nga ba ang pamilya. May nanay, may tatay at may anak. Bata pa lang ako’y dala-dala ko na ang paniniwalang hindi kailanman dapat masira ang isang pamilya. Kahit ano mang problema ang dumating sa buhay ng bawat miyembro ng pamilya ay dapat sama-samang lulutasin ito. Dahil sa pananaw na ito, ganoon na lamang ang pagtataka ko nang malaman kong hindi buo ang pamilya ng isa sa aking mga kakilala. Mas nagulat pa ako nang sinabi niyang, “sabi kasi nila sa akin, kung ano ang puno, siya rin ang bunga. Kaya hindi na ako nagtataka kung bakit ganito kami ngayon.” Naguluhan ako noong una pero nagkaroon ako ng mabigat na loob, naawa. Tiningnan ko siya ng matagal ngunit walang bakas ng sakit o galit akong nakita sa kanya. Binigkas niya ang mgasalitang iyon na tila walang pakiramdam. Dahil dito, naglakas loob akong itanong kung anong pinagdaraanan niya.

            “Maganda naman ang pagsasama ng nanay at tatay ko noon. Masaya kami na buo kami pero nabago lahat ‘yun nung nagloko ang tatay ko. Nambabae siya, siyempre nalaman ng nanay ko kaya naghiwalay sila…” Tumigil siya ng panandalian, kumuha ng ilang sandal upang ituloy ang kwento. Nagsalita nanaman siya. “Nasaktan ako nun, ‘di ko alam kung ano ang gagawin pero mas naawa ako sa mga kapatid ko. Masyado pa kasi silang bata para sa mga bagay na ganito. Lagi nga akong umiiyak nun, gabi-gabi pero dumating sa point na wala na akong pakiramdam.” Sa mga sandaling iyon, hindi ko alam kung ano ang aking sasabihin dahil ako mismo’y walang karansan sa mga ganoong bagay. Tahimik ako noon at nang maramdaman niyang wala akong ibang sasabihin ay itinuloy niya ang kanyang kwento. “Siyempre ‘yung lolo at lola ko eh naghiwalay din nung bata pa ‘yung tatay ko kaya siguro ganun din nangyari sa pamilya namin. Kung ano ‘yung bigat ng damdamin niya sa sinapit niya eh naidala niya sa pamilya namin kaya ganito kami ngayon. Ako nga mismo, natatakot na baka mangyari din sa sarili kong pamilya ‘yung nangyari sa akin e. marami na rin kasi akong kilala na ganun ‘yung nangyari sa kanila. Ayaw kong maniwala pero parang ganun na ‘yun eh. Kung ano ang puno, siya rin ang bunga.” Tumahimik siya bigla, nakatulala at unti-unti ay tumulo ang luha. Wala akong magawa kundi ang yakapin na lamang siya.

            Alam nating lahat na ang kinalakihan ng isang indibidwal ay may malaking epekto sa kanyang pananaw o paniniwala sa kanyang paglaki. Kung ano ang kanyang nasaksihan sa kanyang paglaki ay maaari niya itong maidala hanggang sa kanyang pagtanda. Alam din natin na ang pamilya ang siyang primaryang yunit ng lipunan at dito tayo unang natututo makisalamuha sa iba’t ibang uri ng tao at iba pa kung kaya’t malakas ang nagiging hatak nito sa pag-uugali at personalidad ng isang indibidwal. Hindi dapat ito gawing rason upang ipantakip sa pagkakamali ng isang tao, kundi dapat ay gamitin ito upang mas maging mabuti at responsableng tao.

Group 2

Anna Mae Alamag

Jeska Nicole Cabiles

Dally Delos Santos

Rensea Mae De Vera

Isabella Herreria

Feby Andrea Laroco

Danna Ruiz