Inay, Bakit Po?

          Ang buhay ay sagrado. Ito ang madalas nating marinig lalong-lalo na sa mga simbahan at sa mga taong may malaking pagpapahalaga sa buhay. Sa katunayan nga ay may mga pamilya at ina na sa tuwing sila'y nabibiyayaan ng anak ay lubos na nasisiyahan lalong-lalo na kung ito ay ang kauna-unahan nilang magiging anak. Ngunit bakit may mga babae na naatim na magpalaglag ng mga sanggol sa kanilang mga sinapupunan na kung iisipin ay isang paraan ng pagpatay. At ang pagpatay ay isang krimen hindi lamang sa batas ng tao kundi pati na rin sa batas ng Diyos. Hindi man lang ba sila nagdalawang-isip na sa pamamagitan nito ay malalabag nila ang kautusan ng Diyos at sila'y magkakasala sa kanya? Hindi man lang ba sila nakonsensya sa buhay na kanilang ipinagkait sa isang batang wala pang kamuwang-muwang na kung magsasalita sana ay makikiusap na huwag siyang ipalaglag?

Nakakalungkot mang isipin ngunit ito ang katotohanan na nangyayari ngayon sa ating lipunan, na may mga sanggol na pinapalaglag ng kanilang mga ina. At kung makakapagsalita lamang ang mga inilalaglag na sanggol, maaaring ito ang sasabihin nila, “Inay bakit mo ito hinayaang mangyari? Dahil ba magulo ang iyong isipan ng mga oras na iyon. Marahil napuno ka ng galit dahil hindi mo inaasahang ako'y mabuo sa loob ng iyong sinapupunan. Marahil hindi mo kinaya ang sobrang depresyon dahil sa mga sinasabi ng ibang tao sa iyong sitwasyon. O marahil natakot ka na ito'y malaman ng iyong mga magulang dahil ikaw ay nasa murang  edad pa lamang. Bakit inay? Nais kong malaman ang iyong dahilan kung bakit mo ito nagawa. Kung hinayaan mo lang sana akong mabuhay, marahil ay malaki na ako ngayon. Malayang napagmamasdan ang ganda ng kapaligiran. Kung paano sumikat at lumubog ang araw sa silangan at kanluran, malayang napapakinggan ang mga huni ng ibon sa alapaap at malayang nalalasap ang simoy ng hangin. Kung hinayaan mo lang sana ako, marahil ang buhay ko ngayon ay katulad ng mga normal na bata sa mundong ito. Masayang nakapaglalaro kasama ang aking mga kaibigan, nakakapag-aral upang maabot ang aking mga pangarap sa buhay, at malayang nagagawa ang anumang aking nais gawin. Bakit mo ako pinagkaitan ng buhay inay? Nais ko sanang maranasan ang init ng iyong mga bisig habang ako'y iyong kalung-kalong at kinakantahan ng isang awitin.”

Ang batas ng Pilipinas ukol sa aborsyon ay isa sa mga pinakaistrikto sa buong mundo. Ito ay iligal at may kaukulang mga parusa sa kung sino mang mahuhuling gumagawa nito. Gayunpaman, dahil sa maraming hindi inaaasahang pagbubuntis, ang aborsyon ay karaniwang ginagawa sa ating bansa. Base sa isang pag-aaral, tinatayang 560,000 na aborsyon ang nangyari noong 2008 at 610,000 naman noong 2012. Marami rin ang mga namamatay na mga ina na sumusubok ng aborsyon dahil sa mga delikadong paraan na kanilang ginagawa upang malaglag ang bata sa kanilang sinapupunan. Tinatayang 1,000 na mga babaeng Pilipino ang namamatay bawat taon dahil sa mga kumplikasyon na dulot ng aborsyon. Noong 2012, mahigit kumulang 100,000 na mga babae ang naospital dahil sa kumplikasyon ng aborsyon, at meron pang hindi mabilang na mga babaeng Pilipinong nagdurusa sa mga komplikasyon na hindi nabibigyan ng lunas.

Tama na! Tuldukan na ang hindi makataong aborsyon ng ilang mga ina. Ilang buhay pa ba ang dapat makitil upang matauhan ang mga taong ito sa kanilang ginagawa? Ilang makabagbag damdamin na mga sentimyento pa ba ang dapat marinig mula sa mga batang pinapalaglag na tila piping nagsasalita upang ipahayag ang kanilang nararamdaman? Kailangan nating pahalagahan ang bawat buhay dahil ito'y minsan lang sa ating pinagkakaloob ng Diyos at ito'y sagrado.

SOURCE:

Unintended Pregnancy and Unsafe Abortion in the Philippines (2013, July). Retrieved from:                 http://www.guttmacher.org/pubs/FB-UPUAP.html

GROUP 6

Domingo, Mark Anthony

Jacobe, Dessa Mae

Perez, Jeff

Posilero, Jinky

Rubiano, Jeremie

Tajan, Patrisha Willyn Mae